Osmani: Duhet t’u sigurohet qasja në drejtësi të gjithë qytetarëve
Kryetarja e Kuvendit, Vjosa Osmani, ka pritur sot në takim përfaqësues të Agjencisë për Ndihmë Juridike Falas.
Në takim u diskutua kërkesa e kësaj Agjencie për sigurimin e buxhetit, i cili do ta mundësonte funksionimin e zyrave të saj pas përfundimit të mbështetjes nga donatorë të huaj.
Kryeparlamentarja Osmani potencoi rëndësinë e funksionalizimit të plotë të kësaj Agjencie për t`i garantuar qasje në drejtësi të gjithë qytetarëve të vendit, në veçanti kategorive sociale. Në këtë kontekst, zonja Osmani u zotua se do të ndërmarrë hapa konkret brenda kompetencave të saj për të ndihmuar Agjencinë për ta siguruar buxhetin për funksionim të saj, thuhet në një njoftim.
Ndërkaq drejtoresha ekzekutive e ANJF-së, Anita Alaj-Kalanderi, e njoftoi kryetaren e Kuvendit se deri më tani kjo Agjenci ka proceduar afro 45 mijë kërkesa juridike të qytetarëve. Ajo ka theksuar se përkundër përpjekjes për t`u shtrirë në gjithë territorin e Kosovës, Agjencia nuk ka arritur ta bëjë këtë gjë, shkaku i kufizimeve buxhetore.
