Nëntë persona lirohen nga karantina, pjesa tjetër në Qendrën e Studentëve
Nëntë persona janë liruar sot nga karantina në Qendrën e Studentëve në Prishtinë, meqë të njëjtit nga analizat që u janë bërë mbrëmë kanë dalë që nuk janë të infektuar me Covid-19. Ndërsa numri i personave që aktualisht po qëndrojnë të karantinuar në këtë qendër është 168.
“Nëntë persona janë liruar sot, të gjithë kanë dalë negativë që janë testuar dje, dhe 168 është numri momental i personave që po qëndrojnë në karantinë në Qendrën e Studentëve”, tha drejtori i Qendrës së Studentëve, Fatmir Sfishta.
Aktualisht numri i personave të infektuar me Covid-19 në Kosovë është 780, ku 22 kanë vdekur dhe 201 janë shëruar.
Republika e Kosovës ka hyrë në javën e shtatë të përballjes me koronavirus, që prej 13 marsit kur u regjistruan rastet e para.
Qeveria e Kosovës ka pezulluar mësimin në shkolla, punën në restorante, ka mbyllur qendrat tregtare e lokale të tjera, si masë mbrojtëse ndaj Covid-19.
Ndërkohë me vendim të Ministrisë së Shëndetësisë, prej 15 prillit qytetarët mund të dalin nga shtëpitë e tyre vetëm për 90 minuta në ditë, duke respektuar numrin e parafundit të letërnjoftimit i cili i përcakton orën për qarkullim.
