Infektologu Krasniqi: 72 vjeçari që ndërroi jetë sot kishte sëmundje tjera shoqëruese
Në orët e mbrëmjes në Klinikën Infektive ka ndërruar jetë 72 vjeçari nga Gjilani i prekur nga koronavirusi.
Infektologu Valbon Krasniqi ka theksuar që personi që ka ndërruar jetë “kishte edhe sëmundje tjera shoqëruese”.
“Pacienti që ka ndërruar jetë sot kishte edhe sëmundje tjera shoqëruese. Për momentin në Klinikën Infektive i kemi 41 pacientë të prekur me Covid 19. Pesë nga ta janë me oksigjenoterapi dhe dy të tjerë janë në kujdesin intensiv, ndërsa gjendja e tyre është kritike”.
“Pacientët e tjerë janë në gjendje të mirë. Ata pacientë që janë në gjendje kritike janë të moshës së shtyrë. Kanë edhe sëmundje tjera shoqëruese , gjë që e rëndon edhe më shumë gjendjen e tyre. Ne po bëjmë të pamundurën që tu ofrojmë ndihmën mjekësore”.
Krasniqi në Klan Kosova, ka thënë që deri tani ia kanë dalë që të menaxhojnë numrin e pacientëve që janë shtruar në Klinikën Infektive.
“Për momentin Klinika Infektive ka 125 shtretër në dispozicion, ndërsa janë liruar edhe dy klinika tjera. Kemi për momentin 250 shtretër në gjendje gatishmërie. Fatmirësisht nuk ka pasë nevojë të përdoren. Deri tani jemi duke ja dalë me kapacitetet e kësaj Klinike”.
Sipas Krasniqit, problem për transmetimin e virusit janë tubimet familjare.
“Në pothuajse të gjitha komunat e Kosovës, të gjitë të infektuarit janë familjarë.Tubimet e vogla familjare janë bërë problem për transmetimin e virusit duke mos përjashtuar edhe format tjera”.
“Nuk kemi informata që njerëzit po i shmangen testimeve për Covid 19. Po shohim që nuk po respektohen masat për të qëndruar në shtëpi. Gjithashtu po i shohim rrugët me plot automjete dhe njerëz që qarkullojnë”, ka thënë Krasniqi, duke apeluar për kujdes të shtuar nga qytetarët.
