Dodë Gjergji në javën e pashkëve lutet për mjekët dhe të gjithë ata që po luftojnë koronavirusin
Në Katedralen “Shën Nënë Tereza”, është mbajtur mesha e shenjtë e së dielës së Larit, me anë të së cilës sot Kisha Katolike në Kosovë, fillon javën e madhe dhe përgatitjen për festën e Pashkëve.
Si asnjëherë më parë, kisha kishte marrë pamje të zymtë e krejt kjo për shkak të mungesës së besimtarëve të fesë katolike, të cilët në ditët e zakonshme mbushnin sallën, kurse në këtë kohë janë të detyruar të qëndrojnë në shtëpi dhe të mos marrin pjesë në hapjen e javës së madhe të Pashkëve, për ta parandaluar kështu përhapjen e pandeminë COVID-19.
Ipeshkvi i Kosovës, Dodë Gjergji, tha se për sakrificën e mjekëve, infermierëve, policëve dhe të gjitha të tjerëve që po luftojnë për popullin kundër koronavirusit, do të lutet te Zoti.
“Në emër të kishës ne sot e shtrojmë rrugën me vuajtjen e shumë njerëzve, dëshiroj të paraqesë, siç thoshte Papa Françesku, këto ditë të gjithë trishtimin e njerëzve, t’i vejë përpara kamëve të Krishtit, i cili hynë dhe na prinë neve në Jerusalemin qiellorë, të gjithë sakrificën e mjekëve, infermierëve, policëve dhe të gjitha shërbimeve të tjera, që janë vu në luftë, kundër kësaj të keqe dhe në shërbime, të shpëtimit të jetës së njerëzve , ja paraqesë uratën çdo besimtari nga shtëpia e vetë,”, thotë Gjergji.
Dodë Gjergji i bëri thirrje të gjithë besimtareve të krishterë që të qëndrojnë të durueshëm sepse kjo etapë do të kalojë.
Ai theksoi se gjatë kësaj jave duhet të përjetojmë, vuajtjen që ka përjetuar Krishti.
“E dimë që jemi duke marrë pjesë të gjithë në një lloje, kalvari të jetëve tona, të ditëve tona, të kohës tonë, po le t’i gëzohemi asaj se çka do të ndodh mëtanë, pasi të kalojë, pasi ta përballemi dhe i lutemi Zotit hyjit tonë që të na jep, durimin, të na forcoj dhe shtoj dashurinë, fenë dhe të na mbaj me gëzim në mënyrë që deri sa të përjetojmë gjatë kësaj jave gjithë vuajtën e Krishtit, brenda asaj vuajte të gjejmë gëzimin, shpresën dhe dashurinë”, thotë Gjergji.
Gjergji theksoi se në hyrjen e kësaj jave, të shenjtë për ta kanë pasur dy elemente të rëndësishme, bekimin e larit dhe përjetimin e gëzimit
“Sot duke hy në javën e madhe, ne i kemi pasur dy elemente të rëndësishme, bekimin e larit, përjetimin e gëzimit, përpara se të kujtojmë mundimet dhe vuajtjen e zotit tonë Jezus Krishtit, sepse Krishti përpara se të pranonte vuajtjen, përpara se të hynte në vdekjen e tij, ai donte solemnisht të hynte në Jerusalem ku do të kryqëzohej”, thotë Gjergji.
Ndryshe,me këtë të diele të Larit të mundimeve të Zotit Jezus Krisht, për Kishën Katolike fillon java e shenjtë ose java e madhe e Pashkëve.
