Selmanaj thotë se LDK e dinte Kurti do ta prishte marrëveshjen kur të vinte puna te presidenti
Deputeti i LDK-së, Driton Selmanaj ka akuzuar Albin Kurtin si person që nuk pranon mendimin ndryshe.
Selmanaj, në “Debat Plus” ka thënë se LDK nuk e dëshiroi prishjen e koalicionit me Vetëvendosjen por se një gjë e tillë ishte domosdoshmëri për Kosovën.
Ai thotë se edhe LDK ishte për reciprocitet por kërkesat e SHBA-së gjatë procesit ndryshuan rrjedhën.
“SHBA e thanë çartë se taksa duhet të hiqet, ndërsa reciprociteti nuk duhet të vendoset. Ne nuk kemi pasur rrugë tjetër”.
Deputeti i LDK-së duke folur për përplasjet që rrëzuan koalicionin thotë se mendimi i Veliut ishte personal dhe nuk kishte të bënte me shkaktim paniku.
“Qeveria nuk ka të bëjë asgjë me gjendjen e jashtëzakonshme. Gjendjen e jashtëzakonshme e shpall vetëm Kuvendi i Kosovës”.
Selmanaj thotë se Albin Kurti nuk është i gatshëm për demokraci parlamentare.
“Kurti nuk mund të punojë të tjerët, nuk mund të pajtohet me të tjerët dhe nuk mund të dëgjojë mendimin ndryshe. Tash kur po i del në rrugë dikush tjetër atë po e rrok një paranojë e pakuptimtë”, tha ndër të tjera Driton Selmanaj.
Ai ndër të tjera ka thënë se LDK-ja e ka ditur që Vetëvendosja do ta prishte marrëveshjen e koalicionit, kur do të vinte koha e votimit te presidentit.
“Ne si LDK e kemi pritur që Vetëvendosje do ta prishte marrëveshjen e koalicionit, jo tash, por në kohën kur do të vinte koha e votimit te presidentit. E kemi ditur se Vetëvendosje do ta prishte marrëveshje me neve. Ne mendojmë që ata e kanë prishur marrëveshjen me neve”, ka thënë Selmanaj.
