Grenell e ka të përkohshme detyrën e re në SHBA, katër kandidatë në garë për pozitën e tij
Presidenti i Shteteve të Bashkuara, Donald Trump, tha se katër kandidatë janë duke u shqyrtuar për pozitën e Drejtor të Inteligjencës Kombëtare.
“Vendimi do të merret brenda disa javësh” ka shkruar presidenti Trump në Twitter.
Four great candidates are under consideration at DNI. Decision within next few weeks!
— Donald J. Trump (@realDonaldTrump) February 21, 2020
Ndërkohë presidenti Trump kishte ritheksuar besimin e madh që ka në ambasadorin Grenell.
“Jam i kënaqur të njoftoj se ambasadori ynë shumë i respektuar në Gjermani, Richard Grenell, do të bëhet ushtrues detyre i Drejtorit të Zbulimit Kombëtar. Rick (Richard Grenell) ka përfaqësuar vendin tonë jashtëzakonisht mirë dhe mezi pres të punoj me të”, ka shkruar presidenti Trump në Twitter.
Por, vetë ambasadori Grenell përmes një postimi në Twitter, ka thënë se nuk do të jetë për një kohë të gjatë në atë post.
“Presidenti do të njoftojë të emëruarin (jo mua) së shpejti”, ka shkruar Grenell.
Correct. Acting. The President will announce the Nominee (not me) sometime soon. https://t.co/9ShqB2eXea
— Richard Grenell (@RichardGrenell) February 20, 2020
Zyra e Drejtorit të Inteligjencës Kombëtare shërben si mbikqyrëse e Komunitetit të Shërbimeve të Inteligjencës që përbëhet nga 16 agjenci të ndryshme zbulimi, më e nohura prej të cilave është Agjencia Qendrore e Inteligjencës (CIA). Kjo zyrë u krijua pas sulmeve të 11 Shtatorit 2001, për të bashkërenduar punën e agjencive të zbulimit.
Posti i Drejtorit të Inteligjencës Kombëtare duhet të konfirmohet nga Senati amerikan.
Sipas ligjit federal, afati i mandatit për një ushtrues detyre në agjencitë ekzekutive, i emëruar nga presidenti i Shteteve të Bashkuara, është 210 ditë.
Pastaj, kërkohet miratimi i Senatit.
