Gazetari britanik ia kujton Albin Kurtit strukturat paralele të Serbisë në Kosovë

Gazetari britanik Tim Judah, njohës i zhvillimeve në Ballkan, i ka kujtuar kryeministrit Albin Kurti se në Kosovë akoma gjenden strukturat paralele të Serbisë, ndonëse ai është zotuar për reciprocitet dhe për zbatim të marrëveshjeve të nënshkruara në Bruksel.

Ai i ka bashkëngjitur postimit të tij në Twitter një fotografi ku shihet një zyrë e Ministrisë së Financave të Serbisë në Kosovë.

“Qeveria e re e Kosovës do të vendosë për ‘reciprocitetin’ me Serbinë në ditët në vijim, ashtu siç do të vendosë edhe se çfarë do të bëjë me pjesët e paimplementuara të marrëveshjeve që janë tashmë të nënshkruara. Këtu shihet zyra e Ministrisë së Financave të Serbisë në veri të Kosovës. Fotografinë e shkrepa dy javë më parë”, ka shkruar ai.

Në pllakën e objektit që e ka fotografuar britaniku shkruan “Ministria e Financave të Serbisë, Administrata e Thesarit, Filiali në Mitrovicën e Kosovës”.

Kosovo’s new government will decide on “reciprocity” with Serbia in the coming days and decide what to do about unimplemented parts of agreements already signed. Here is an office of Serbia’s Min of Finance in north Kosovo from a picture I took two weeks ago. pic.twitter.com/AoqJU8DWHi

— Tim Judah (@timjudah1) February 19, 2020