Mini apo makro-shengen, përplasja e Edi Ramës me Albin Kurtin
Prioritetet e Albin Kurtit dhe Edi Ramës ndryshojnë, e kjo u pa edhe në konferencën e përbashkët të dy kryeministrave. Kurti thotë se takimi i sotëm i të dyve ishte më shumë për “makroshengenin shqiptar”, e Rama pastaj tha se “s’ka makroshengen shqiptar, pa minishengen ballkanik”.
Albin Kurti ka folur për herë të parë nga Tirana si kryeministër i Kosovës, në një konferencë të përbashkët me kryeministrin Edi Rama.
Kurti e ka nisur konferencën e tij, duke treguar se sa shumë e vlerëson ndihmën që Shqipëria ia ka dhënë Kosovës në luftë e pas saj.
“Me këtë rast, dua ta falëndëroj Republikën e Shqipërisë për ndihmën e pakursyer e të parezervë për Kosovën. Kosova nuk do t ia dilte ballë Serbisë në luftë, pos as në paqe pa Shqipërinë.
Ndërsa tha se ai me homologun e tij nga Shqipëria do të avancojnë si dy kryeministra.
“Ky është takimi i parë, ka shumë tema që do t’i trajtojmë. Këtë temë (minishengenin) e kemi diskutuar, por pak. Ky takim ishte më shumë për makroshengenin shqiptar, se sa minishengenin ballkanik”, është shprehur tutje Kurti.
Megjithatë kryeministri i Shqipërisë nuk u pajtua me prioritetet që i renditi Kurti. Rama tha se fillimisht duhet të flasin për minishengenin ballkanik.
“S’ka makroshengen shqiptar, pa minishengen ballkanik”, ia ka kthyer Rama./FaktePlus
