Edhe sot në meshën e Krishtlindjes, thirrje për më shumë dashuri (VIDEO)
Qytetarë nga rajone të ndryshme të Kosovës edhe të mërkurën janë tubuar në katedralen “Shën Nëna Terezë” në Prishtinë, për të qenë pjesë e meshës së Krishtlindjes.
Edhe gjatë kësaj meshe është bërë thirrje për më shumë paqe dhe dashuri, e përpjekje për të bashkuar të gjithë njerëzit pa dallime.
Këto e mesazhe tjera ka dhënë Ipeshkvi i Kosovës, Imzot Dodë Gjergji.
“Të nderuar besimtarë, të dashur, fillojmë meshën e pestë me radhë në ditën e lindjes së Jezu Krishtit, kënaqësi se Zoti na dha bashkë me falënderim sepse ai na tha të jemi në kërkim të jetës dhe dashurisë, dhe vëllazërisë të bashkimit dhe durimit”.
Madje Ipeshkvi Gjergji në një prononcim për FaktePlus tha se vazhdimisht luten që gjithë njerëzit pa dallim të fokusohen e të arrijnë paqe të përhershme në mes tyre.
“Është një festë e përgjithshme mbi të gjitha e të krishterëve, dhe besimtarëve dhe çdo njeriu të vullnetit të mirë, sepse është solidariteti i Zotit me njeriun që na aftëson që të jemi solidarë, jo vetëm njëri pranë tjetrit, por njëri me tjetrin, afër tjetrit dhe bashkë me tjetrin.
Prandaj dhashtë Zoti që të lulëzojë jeta, të lulëzoj dashuria dhe jeta dhe dashuria të na dhuroj paqe me vetveten me njëri tjetrin, dhe me dhuruesin e paqes që është zoti. Prandaj urime dhe përgëzime të gjithë njerëzve të vullnetit të mirë”, tha ai.
E qytetarët të lumtur nga kjo festë shprehin të gjitha të mirat për të gjithë shqiptarët në gjithë botën.
“Urime të gjithë kombit shqiptar festën e kërshëndellave. Secila festë i ka simbolet e veta edhe kjo ringjallja e Krishtit fëmijë, ringjallja e secilit prej nesh me fillu me dashuri me paqe dhe vullnet të mirë”, thotë një qytetar.
Kurse një tjetër qytetar thotë se po ndjehet mirë që festa e Krishtlindjes në qytetin e Prishtinës është shënuar si nga besimtarët e krishterë ashtu edhe nga ata myslimanë.
Ndërsa një urim të veçantë e ka dhënë edhe një motër nderi për të gjithë njerëzit.
“Ju përshëndes të gjithëve shumë dhe dua t’iu them të gjithë atyre që e festojnë urojë ditën e Krishtlindjes, ndërsa atyre që nuk e festojnë u them që jemi vëllezër dhe t’i gëzohen lindjes së Pejgamberit “Isa””, thotë mugersha.
Kujtojmë se mesha e mesnatës është mbajtur mbrëmë në orën 24:00 dhe kjo meshë mbahet në të gjitha kishat e botës ku ndizen qirinj dhe kryhen ritet fetare në nderim të Krishtit./FaktePlus