Shala: Kosova po vazhdon të krijojë zona ekonomike
Ministri i Tregtisë dhe Industrisë, Endrit Shala ka marrë pjesë në simpoziumin e mbajtur lidhur me investimet në Kosovë, të organizuar nga Klubi afarist France Albanie Bussiness (FAB) dhe Klubi afarist frankofon në Kosovë (KOCAF).
Në fjalimin e tij në këtë simpozium, ministri Shala ka theksuar se Kosova si një shtet i ri ka sfida të mëdha përpara vetes, të cilat kanë të bëjnë më shtetndërtimin dhe me krijimin e përvojave apo praktikave në mënyrë që të ecim hapave të sigurt të zhvillimit.
Sipas një komunikate për media, Shala ka shtuar se Qeveria e Kosovës po bën hapa të rëndësishëm në adresimin e këtyre sfidave.
“Edhe raporti i fundit i Bankës Botërore ka treguar se ne si MTI kemi bërë reforma të thella në përmirësimin e klimës së të bërit biznes dhe Kosova renditet e 10-ta në botë sa i përket regjistrimit të biznesit”, është shprehur Shala.
Ai ka theksuar se Kosova është në krijim e sipër të një infrastrukture moderne ligjore e cila është në përputhje me të gjitha direktivat e shteteve evropiane.
“Në Kosovë kemi një sistem taksiv më të lehtë dhe më të gjerë në rajon, që po na bën më atraktiv për investitorët e jashtëm. Kosova po vazhdon të krijojë zona ekonomike më të gjithë infrastrukturën përcjellëse për t’iu ofruar kushte sa më të mira bizneseve që janë të interesuara të punojnë në Kosovë. Për Kosovën vendet frankofone, sidomos Franca është ndër partnerët kryesorë politikë dhe ekonomikë të vendit dhe jam i lumtur sot t’ju them se kemi krijuar hapësirë për të rritur bashkëpunimin ekonomik, përmes krijimit të kushteve që këta investitorë ta kenë Kosovën një vend ideal për investimet e tyre”, potencoi Shala.
Ai bëri të ditur edhe faktin se tashmë është jetësuar Ligjin për investime strategjike dhe se investitori i parë tashmë ka marrë statusin e investitorit strategjik dhe së shpejti do të fillojë investimin në energji me erë.
Më tej, ministri Shala sqaroi se Ligji për investime strategjike përmban lehtësira administrative, procedurale dhe investitorët potencialë e kanë rrugën e hapur.
Ministri Shala gjithashtu u shpreh i kënaqur se do të ketë së paku një investitor francez, që do të hyjë si investitor strategjik në kuadër të Ligjit për Investime Strategjike, i cili do të investojë në energji të ripërtritshme, e që do të ndikojë direkt në arritjen e standardeve të kërkuara nga Bashkimi Evropian në mënyrë që të arrihet njëzet përqindëshi i prodhimit të energjisë së ripërtritshme.
Krahas investimeve strategjike, ministri Shala ripohoi se është duke punuar shumë që të rritet tregtia me vendet frankofone dhe tanimë është iniciuar bashkëpunimin me vendet e EFTA-së, e së shpejti do të hapen negociatat për marrëveshje të tregtisë së lirë me këto vende.
Ndër të tjera, ministri Endrit Shala tha se prioritet i përhershëm i MTI-së, është bashkëpunimi me ministritë tjera për adresimin e nevojave të bizneseve në mënyrë që të përgatitet fuqia punëtorë në përputhje me kërkesat e tyre.
Në fjalimin e tij, Endrit Shala edhe njëherë i inkurajoi investitorët dhe këtë forum që të gjejnë mundësinë për të investuar në Kosovë.